Merii Mahabuub Kahiin Aur Milaa Kar Mujhase Lyrics - Ghazal | Rehman | Meena Kumari | Sunil Dutt | Mohammad Rafi

taaj tere liye ik mazahar-e-ulfat hii sahii
tum ko is vaadii-e-rangiin se aqiidat hii sahii
mere mahabuub kahiin aur milaa kar mujh se
bazm-e-shaahii men gariibon kaa guzar kyaa maanii
sabt jis raah pe hon satavat-e-shaahii ke nishaan
us pe ulfat bharii ruuhon kaa safar kyaa maanii
merii mahabuub pas-e-padraa-e-tash_hiir-e-vafaa
tuu ne satavat ke nishaanon ko to dekhaa hotaa
mudraa shaahon ke maqaabir se bahalane vaalii
apane taariik makaanon ko to dekhaa hotaa
anaginat logon ne duniyaa men muhabbat kii hai
kaun kahataa hai ki saadiq na the jazbe un ke
lekin un ke liye tash_hiir kaa saamaan nahiin

kyon ke vo log bhii apanii hii tarah mufalis the
ye imaaraat-o-maqaabir ye fasiilen, ye hisaar
mutal-qulhukm shahan_shaahon kii azamat ke sutuun
daaman-e-dahar pe us rang kii gulakaarii hai
jis men shaamil hai tere aur mere ajadaad kaa khuun
merii mahabuub! unhen bhii to muhabbat hogii
jinakii sannaa_ii ne bakhshii hai ise shakl-e-jamiil
un ke pyaaron ke maqaabir rahe benaam-o-namuud
aaj tak un pe jalaa_ii na kisii ne qandiil
ye chamanazaar ye jamunaa kaa kinaaraa ye mahal
ye munaqqash dar-o-diivaar, ye maharaab ye taaq
ik shahanashaah ne daulat kaa sahaaraa le kar
ham gariibon kii muhabbat kaa udaayaa hai mazaak
mere mahabuub kahiin aur milaa kar mujhase