Madhur Madhur Mere Diipak Jal Lyrics - Non-Film | Saigal | Non

madhur madhur mere diipak jal !
yug yug pratidin pratixan pratipal,
priyatam kaa path aalokit kar !
saurabh phailaa vipul dhuup ban,
mridul mom saa ghul re mridu tan;
de prakaash kaa sindhu aparimit,
tere jiivan kaa anu anu gal !
pulak pulak mere diipak jal !
saare shiital komal nuutan
maang rahe tujhase jvaalaa-kan
vishva-shalabh sir dhun kahataa 'main
haay na jal paayaa tujh men mil' !
sihar sihar mere diipak jal !
jalate nabh men dekh asankhyak,
snehahiin nit kitane diipak;
jalamaya saagar kaa ur jalataa,
vidyut le ghirataa hai baadal !
vihans vihans mere diipak jal !
drum ke ang harit komalatam,
jvaalaa ko karate hridayangam;
vasudhaa ke jad antar men bhii,
bandii hai taapon kii halachal !

bikhar bikhar mere diipak jal !
merii nishvaason se drutatar,
subhaga na tuu bujhane kaa bhay kar
main anchal kii ot kiye huun,
apanii mridu palakon se chanchal !
sahaj sahaj mere diipak jal !
siimaa hii laghutaa kaa bandhan,
hai anaadi tuu mat ghadiyaan gin;
main drig ke axay koshon se
tujh men bharatii huun aansuu jal !
sajal sajal mere diipak jal !
tama asiim teraa prakaash chir,
khelenge nava khel nirantar;
tama ke anu anu men vidyut saa
amit chitra ankit karataa chal !
saral saral mere diipak jal !
tuu jal jal jitanaa hotaa xaya,
vah samiip aataa chhalanaamaya;
madhur milan men mit jaanaa tuu
usakii ujjvala smita men ghul khil !
madir madir mere diipak jal !
priyatama kaa path aalokit kar !