Lyrics

dekhanaa unakaa kanakhiyon se idhar dekhaa kiye
apanii aah-e-kam-asar kaa ham-asar dekhaa kiye
jo ba-jaahir hamase sadiyon kii musaafat-bar rahe
ham unhen har gaam apanaa hamasafar dekhaa kiye
lamhaa lamhaa waqt kaa sailaab chadhataa hii gayaa
raftaa raftaa duubataa ham apanaa ghar dekhaa kiye
ko_ii kyaa jaane ke kaise ham bharii barasaat men
nazar-e-aatish apane hii dil kaa nagar dekhaa kiye
sun ke wo 'shahazaad' ke asha_aar sar dhunataa rahaa
thaam kar ham donon haathon se jigar dekhaa kiye